Demokrasi Ndik Salah (Bahasa Kutai)

Sebagaimana yang etam ketahui segala, karena etam dah berempu TV dirumah bahwa etam ndik kawa lagi milih BUPATI dan GUBERNUR etam sorang karena dah diatur sida di RUU PILKADA waktu tu, jujur aja nyawa ndik tahu apa kah perasaan sida molah kesah tegaktu, beridik lop hati nyawa ndengar. Betanya kali hati nyawa ni, apa ngenai sida tegaktu.

Ada yang bepadah ngehabisi pitis Negara boros amun etam – etam yang milih pemimpin etam, uja sida baik diberikan kejalanan, sekolahan, dll, ada jua yang padah etam balik ke sila 4 PANCASILA. Bebunyi “kerakyatan yang dipimpin oleh hikmat dalam permusayaratan/perwakilan”, uja sida lagi rawan politik pitis, dik mana kenanya amun etam ngumpati liur sida. Tegak – tegaknya yang etam polah selama ni sia – sia maha.

            Nyawa ni ndik jua hak yo sok madahi urang, tapi kan etam dah tahu segala Wakil Rakyat etam tu pintar – pintar bepikir dan dapat beri solusi untuk bangsa ni, maksudku jangan hak gara – gara masalah pribadi atau kelompok di bawak – bawak ke situ, supan lop dilihati urang luar etam besaong, mana nilai tukar rupiah etam turun gasaknya.

            Nyawa ndik nyalahkan satu pihak dan ndik dukung yang lain, tapi etam cobia hak bepikir nggenah amun etam tetap makai demokrasi atau milih langsung di TPS. Etam realistis aja dah :

1.    Masyarakat umpat jua meramekan dan mikirkan nasib Bangsa karena sida jua berempu beban milih. Amun belum sempurna wajar hak leh, namanya etam baru mulai. Tapi coba kita lihati sida – sida yang milih tu betambah kalok wawasannya.

2.    Ngehidupi urang banyak, ekonomi menengah kebawah tegak tukang cetak kartu nama, tukang molah sepanduk, tukang masang sepanduk, lelek dan bulek yang jualan diwarong, tukang molah baju, ngurangi pengangguran untuk sida umpat ke KPU dan panwas, banyak leh. Amun masalah politik pitis subyektip beneh hak alasan, tegak kah amun pemilihan DPRD dikda tegaktu. Tahik kunuy ae sida ndak jujur segala. Hitungan nyawa dik lawas sida ditangkap KPK

3.    Etam dapat pemimpin yang teuji. Karena etam tahu gala amun ndak nyatukan kepala orang banyak tu jereh banyak aja njelekkan satu dengan yang lainnya tu. Sebujurnya ada aja yang dik ketangkapan maen pitis tapi amun demokrasi ni bejalan terus bebaik sorang ndia karea dengan tu orang – orang etam bepintar. Amun disetop pups hak kesahnya balik tegak jaman Suharto etam dan nyawa dik gawal. Jadi tegaktu – tegaktu maha Indonesia dik bekembang.

Ada aja pang lagi yang ndak nyawa sampaikan dalam tulisan ni tapi menurutku tiga ni cukup aja untuk jelaskan dampak positip dengan pemilu yang dipolah wayah ni. Sekali Lagi ku padahi kita “pikirkan orang kelaparan dan pemuda desa yang ndik kerja” …. Jangan gara – gara kita sida menderita. Karena kita molah sistm dan jalankan system…